இரண்டு ராஜாக்கள் இணையும் புதிய படம்!

இளசுகளோட தேசத்தின் இன்ப சாவி, இப்போது யுவன் கையில்! மீடியத்துக்கு மேலே, மொகவுக்கும் கீழேங்கிற அளவுகோலோட சம்பளம் வாங்குவதால், யுவன் ஆர்மோனியத்தில் எப்போதும் பண மழை!

ஜெயம் ராஜா இயக்கும் படங்களின் பாடல்களில் இனிப்பு கொஞ்சம் தூக்கலாகவே இருக்கும். முதல் படமான ஜெயம் ல் துவங்கி லேட்டஸ்டாக வந்த சந்தோஷ் சுப்பிரமணியன் வரைக்கும், ஒவ்வொரு படத்தையும் ஹிட்டாக்குவதோடு, மியூசிக்கல் ஹிட் ஆக்குவதும் ராஜாவின் யுக்திகளில் ஒன்று. இந்த ராஜாவும், அந்த (யுவன்சங்கர்) ராஜாவும் இணையப் போகிறார்கள் முதன்முறையாக!

தெலுங்கில் ரவிதேஜா, இலியானா, ஷாம் இணைந்து நடித்த கிக் என்ற படம், அங்கு சக்கை போடு போட்டது. அதன் தமிழ் உரிமையை வாங்க பெரும் போட்டி. இறுதியில் வென்றவர் எடிட்டர் மோகன்தான். இதற்கு முன்பே இவர் வாங்கிய பல தெலுங்கு படங்களில் தமிழில் பெரிய வெற்றி பெற்றதால் கூட, இவருக்கு முன்னுரிமை வழங்கப்பட்டிருக்கலாம். இதில்தான் இப்போது ஜெயம் ரவி நடிக்கிறார். இவருக்கு ஜோடியாக நடிக்கிறார் தமன்னா. ரவியோடு ஜோடி சேர்ந்த சதா, அசின், த்ரிஷா, ஜெனிலியா என்று எல்லாருமே மும்பைக்கு போய்விட்டார்கள். அடுத்து தமன்னா போலிருக்கிறது. வாழ்க!

இப்போதே பட்டிதொட்டியை பரபரப்பாக்கியிருக்கும் ஜெயம் ரவி, இப்படம் வெளி வந்தால் தமிழ்சினிமாவின் மாஸ் ஹீரோக்களில் ஒருவராகிவிடுவார் என்கிறது கோடம்பாக்கம் கருத்துக்கணிப்பு ஒன்று. இப்படம் சம்பந்தமாக அறிவிக்கப்படாத இரண்டு விஷயங்கள்.

ஒன்று- தமிழிலும் ஷாம் நடிப்பாரா? இரண்டு- படத்தின் டைட்டில் என்ன? இம்மாத இறுதிக்குள் விஷயம் தெரிஞ்சுரும்...